Hvað er betra á köldum vetrardegi en góð eplakaka? Ég skellti í eina slíka í gær og læt fylgja með einfalda grunnuppskrift, það má breyta henni og bæta að vild allt eftir því hvað ykkur finnst gott og hvað til er í skápunum. Rifinn börkur og safi af sítrónu gefa gott og ferskt bragð, svo eru trönuber og brytjuð epli alltaf góð saman. Þá er lag af deiginu sett í formið, þunnt skornir eplabitar og þurrkuð berin og svo afgangur af deiginu yfir og eplasneiðar ofan á.

Að þessu sinni blandaði ég saman og smurði eplin með hlynsírópi og Pumkin spice, sem er kryddblanda frá Kryddhúsinu. Setti svo pecanhnetur yfir kökuna þegar fimm mínútur voru eftir af bökunartímanum. Ekki gott að setja þær of snemma þar sem þær brenna auðveldlega. Eplin verða svolítið dökk vegna þess að kryddbandan inniheldur kanil, engifer, múskat og negul.

Hér kemur uppskriftin:

Hráefni:

200 gr smjör við stofuhita

200 gr sykur

2 egg við stofuhita

1 teskeið vanilludropar

200 gr hveiti

2 tsk lyftiduft

1,5 dl mjólk

1 – 2 epli

3 matskeiðar hlynsíróp

1 teskeið Pumkin spice (eða kanilduft)

50 gr pecanhnetur

Aðferð:

Stillið ofninn á 175 gráður C og blástur

Hrærið saman smjör og sykur

Bætið eggjum í, einu í einu og hrærið saman

Bætið í vanilludropum, mjólk og þurrefnum og hrærið vel

Smyrjið form með smjöri, ég notaði smelluform sem er 22 cm í þvermál

Hellið deiginu í formið

Kjarnhreinsið eplin, skerið í þunnar sneiðar og raðið fallega ofan á deigið

Hrærið saman síróp og krydd og penslið eplin

Bakið í 35 mínútur og bætið þá hnetunum ofan á og bakið áfram í 5 mínútur eða þar til kakan er bökuð

Kælið í 30 mínútur í forminu og setjið á fallegan kökudisk

Best volg með þeyttum rjóma eða góðum vanilluís

Njótið og hafið það huggulegt!